وانا ماشى فى وسط الخلق
حسيت وكأني مسطول
لقيته بيقول لصاحبه
سيبه حبه
ده اللى يتعب لازم ينول
ولقيت فى جنبه واحد
بيقول ده قال الله
وقد قال الرسول
والتالت ده كان بسيط
قال بالليبرالية والديمقراطية
بالدين والسليقة
بأسهل لهجات العربية
حريــــــــــــة
حرية انك تسمعنى
مش بس أقول كلمتى
حرية فى علم وعيشة
حرية قلم وفم وفكر
من غير تطاول ولا قلة قيمة
حرية اعيش وانا عندى كرامة
مش امشى اهلس وحالة سكر
حرية فى بلد القانون
معروف ديانة ولغة الدولة
مفهوم الصح من الغلط
لو بس كل واحد
من أول الفيل الكبير
لحد النملة والبرغوت
يبدأ بنفسه
قوم نفسك
فين مشكلتك
مشكلتى يا باشا
انى عملت ثورة
وقلت انادى اقول
حرية قال لى الفوضى
وقالوا عنى فلول
وقالوا ترامادول
وقالوا كمان ممول
مع انى بفطر فول
الأول بس نقطة
انا كنت فى الميدان
وكان معايا اخوان
وكنا ضد نظام خسيس
دلوقتى احنا الثوار
واقفين فى الميادين
معانا ناس بتكره
نفس النظام الرخيص
وقالوا عنهم فلول
ما انكرش ان فيهم
أبناء المخلوع
قالوا عنه بابا
الاخوان قالوا مبارك وجمال وعلاء
قالوا عنه الفكر العالى
الاخوان قالوا مكر ودهاء
ولسه الكل بيقول
وانا لسه صايبنى الذهول
من اللى بيقول
ويرد التانى على طول
والتالت لسه بيهتف
مهما الزمان يطول
انادى من كل قلبى
يا مصر حبك فى قلبى
يا مصر يا نبض حبى
حياتى لأجلك رخيصة التمن
نادينى يا بلدى تلاقينى جاى أَلَبي
بقولك بحبك
أيضحي لأجلك
أنام فى برد دربك
وحر نارك فى قلب شمسك
نادينى تلاقينى
عنك بشيل
اشيل فوق كتافى
حبة م الحمل التقيل
وامد ليكى ايدى
وامد لك وريدى
منه تروى أرضك
يا بلدى انا لسه واقف
بدافع عنك ليلاتى
ولسه فى الشوارع
لسه صوتى طالع
يقول تعالى احبك
يا بلدى مرتين
ويا إما الناس دى تفهم
يـ اكمل واعيش مسطول
ماجد حسن
No comments:
Post a Comment